Anarâškielâ kulá nuortâ sämikieláid. Tot sárnoo Aanaarjäävri pirrâsijn. Tehálumos sárnumkuávluh láá Anarist, Avelist, Njellimist já Pärttihist. Ärbivuáválávt anarâškielâ sárnumkuávluh láá ollásávt Suomâ staatâ raajij siste - staatâi rääjih iä lah juáhám anarâšâi juávhu.
Anarâškielâ sárnooh láá sl. 300-400. Stuárráámus uási sárnoin láá jo paijeel 60-ihásiih. Kieskâd álgám anarâškielâ iäláskittemtooimâi keežild taan ääigi láá kuittâg meid ennuv párnááh já pargoihásiih kielâsárnooh.
Anarâškielâ kuávlukielâid puáhtá jyehiđ kyevti juávkun: tavepele kuávlukieláid (Pärttih, Čovčjävri, jna.) já máddáápele kuávlukieláid (Njellim). Tuođâlávt sárnumkielâst láá stuorrâ iäruh meid ovtâskâs sárnoi peht; iäruh láá sehe suujâtmist (kukkoduvvâin já vookaalnubástusâin) já sánáduvvâst.
Anarâškielân lii almostum kirjálâšvuotâ jo suullân 100 ihheed. Tuođâi kirjálâšvuotâ lii lasanâm eskin majemui 20 ive ääigi Sämitige oppâmateriaalpyevtittem já Anarâškielâ seervi ry. kirjekuástidem keežild. Ihečyeđe aalgâst kirjeh lijjii iänááš vuoiŋâliih kirjeh já ulgguubiälásij totkei, nuuvtko Erkki Itkosii teikkâ Frans Äimä, tutkâmušah anarâškielâst. Anarâškielâ čaabâkirjálâšvuotâ lii viehâ uccáá. Anarâškielân láá iänááš jurgâlum párnáikirjeh já muštâlusčuágálduvvah. Täi aaigij láá ittáám uđđâ čälleeh, kođeh pyevtitteh čaabâkirjálijd teevstâid njuolgist anarâškielân, tego Marja-Liisa Olthuis, Riitta Vesala já Anja Kaarret.
Meid oppâmaterial lii anarâškielân ain lamaš viehâ uccáá. Oppâmaterial pyevtitteijee lii taan ääigi iänááš Sämitigge, mii lii-uv olgosadelâm kieskâd maaŋgâlágán oppâkiirjijd škoovlâi já paajeeb tääsi oppâlágádâsâi kiävtun. Liijká máttáátteijeeh ferttejeh rähtiđ jiejah viehâ ennuv material - rahtum material puáhtá kuittâg meid jyehiđ.
Anarâškielâ láá tutkâm iänááš läddliih. Taan ääigi meid anarâšah láá álgám tutkâđ kielâs já čäälliđ tutkâmpuátusijn anarâškielân. Anarâškielâ tutkâm váldusijđo
Kielâravvuuh
Tarbâšah-uv kielâravvuid teikkâ halijdâh-uv jieš taid čäälliđ? Ele almolii Kielâravvuuh-siijđost.
Anarâškielâst tuáimá meid ravvimjuávkku, kote smiättá uđđâ saanijd já fáálá kielâtipšomân kyeskee avžuuttâsâid.