kielâkyeimi (toimâ)

Riemâ kielâkyeimin! (Petra čäällim reivâ ive 2008)

Párnááh tarbâšeh kielâohtâvuođâid, vâi sii kielâtáiđu ovdán já sänirááju vijđán. Mađe eenâb párnáást láá ulmuuh, kiäigijn sárnuđ sämikielâ, tađe pyerebin suu kielâtáiđu šadda já tađe ruokkâdubbooht sun kielâs kiävttá.

Ohtâ párnái kielâtááiđu nanosmittemkonstâ lii kielâkyeimitoimâ, mon tárguttâs lii sirdeđ anarâškielâ kielâkyeimist párnážân luándulávt, táválâš riävgui já ohtâvuođâi peht. Kielâkyeimi ličij párnážân rävisolmooš, kii ij liččiigin kii peri uápis rävisulmuid, mut párnáá jieijâs kielâkyeimi.

Kielâkyeimitoimâ lii rijjâtátulâs, mii ij vaađâ hirmâd ennuv. Tergâdumos äšši lii mättiđ sämikielâ. Kielâgin ij taarbâš mättiđ luuhâđ ige čäälliđ, tondiet ko puhelimáin-uv puáhtá toollâđ ohtâvuođâ. Nubben tergâdumos äšši lii haalu riemmâđ tággáár tooimân. Párnáigijn lii tehálâš toollâđ kiddâ sooppum aašijn já tondiet lii pyeri, et kielâkyeimi váldá tooimâ tuođâst.

Jis kielâkyeimih kávnojeh, te toimâ vuálgá joton puáttee ive peln. Talle uárnejuvvoo tilâlâšvuotâ, kost lii máhđulâš sárnuđ kielâkyeimitooimâst vuáláčällein já eres kielâkyeimi-iävtukkâsâigijn. Talle uápásmup meid párnáid já sii perruid.

Sämikieltäiđusâš rävisolmooš: toovâ kulttuurtavo já riemâ kielâkyeimin!

Ohtâvuođâ kielâkyeimi já párnáá kooskâst puáhtá toollâđ maaŋgânáálá, ovdâmerkkân puhelimáin, reiváin, šleđgâpostáin, tááláá ääigi veikkâ internetohtâvuođáin já tiäđust-uv meid kolliimáin. Mii jo oro lemin vuohâsumos toimâmtääpi. Tot, magarin toimâ šadda, lii kielâkyeimi já párnáá perruu koskâsâš äšši. Ohtâvuođah pyehtih leđe jyehi oho, ohtii máánust, kuohtii keesist, tyelli tälli…aaibâs maht pyeremusávt heivee.

Tilâlâšvuođâ ääigi sierâdep já káhvástâllâp já siämmást peljipiälástâllâp, et kiäh piergejeh pyereest koskânis. Peeivi ääigi ep val meerrid maiden, mut perruuh finnejeh kielâkuoimij ohtâvuođâtiäđuid já väldih ohtâvuođâ iävtukkâsân maŋeláá. Ohtâvuođâ toollâm páácá ohtâsii aalgâ maŋa perrui já kielâkuoimij koskâsâš äššin. Jis tárbu lii, te ohtâsâš tilâlâšvuođâid pyehtip orniđ vala maŋeláá-uv.

Kielikummi, Siida 30.8.08.pdf

Kielikummi.pdf

Ellei toisin mainittu, tämän sivun sisällön lisenssi on Creative Commons Attribution-ShareAlike 3.0 License