Luuhâst lijjii jo masa peeli pustavijn. Mut tot tuše merhâšij, et paijeel peeli vala vailuu:
_ _ _ _ U I _ L Á Á _ _ T U Á _ _ _ N O O _ _ _
Já ubâ celkkuu ij Advent-Benjamin máttám uáivistis hammiđ. Tääl kale ferttij tuše vyerdiđ laseravvuid, veikkâ unohâsân tot sust oroi-uv.
Tast lâi jo moonnâm muáddi peeivi, ko juovlâstáálu lâi suu páguttâm čyeti celkkud čäälliđ. Advent-Benjamin ij tiättám, kolgâččij-uv ton peeleest leđe ilolâš vâi nievrismielâst. Liitukietâ lâi jo puáránâm, já kalba sun masa mielâstis oppeet celkkuid čáláččij, jis nuuvt tohâmáin olgos pesâččij.
Ainba kuittâg tiiptij juovlâstáálu suu vyerdiđ. Jispa sun lâi suu jo toho vájáldittám?
Jispa sun ij juovláid ubâ olgos pesâččiigin?
Algii sust jo váhá konjâleh-uv kulgâđ. Taid ferttij tyelli tälli sihostiđ čoolmijn, teikkâ njamestiđ maasâd njunán, kost toh meiddei olgos viggii. Ohtuu sun ferttij juovlâid čokkáđ ilbisvuođâ tiet.
Taggaar jienâ Advent-Benjaminist šoodâi, et siijdâ peenuv Tähtičiehhee tom kuulâi. Tähtičiehhee-uv lâi stulláálágán tiŋgâ nuuvtko Advent-Benjamin-uv, já moonnâmvuođâst suoi motomin laavijn ovtâstiđ vuoimijdis: Advent-Benjamin čoonâi poccui kyepirijd oohtân já Tähtičiehhee voliittij taid (puáđus: käävci poccud tuápsájii muottui iäge peessâm čuožâd). Tähtičiehhee čuávuškuođij čiärroo jienâ já forgâba tot lâi-uv Advent-Benjamin faŋgâlviste uccâ laasâ ulgguubeln.
- Vuoi pennâgâs, eeđâi Advent-Benjamin ko ooinij suu skippáár laasâst. - Já vuoi mun.
Tähtičiehhee ij tiäđustkin iberdâm, maid ulmuuh sarnuu. Nuuvtpa Advent-Benjamin ferttij-uv čäälliđ puoh aašijd, maid halijdij pennui mainâstiđ. Sun čaalij taavlun, maht sun lâi faŋgâlân karttâm. Já sun čaalij, mondet čiärui. Tähtičiehhee njivoškuođij, já nuuvt suoi - oppeet oovtâst - čiärroin já njivvoin.
Talle kivkked Njunelijne-Äijih Myesi poođij viistán. Sun adelij Advent-Benjaminân kyehti stuorrâ vielgis njunelijne já eeđâi:
- Ele čiäru, pikkâsevŋâdist täsni pyeremusávt uáinoo.
Tast maŋa sun oppeet lappui toho kost lâi puáttám-uv.
Advent-Benjamin sihoi njuunees já čolmijdis, já lijneest lâi nuuvt lieggâ opsâ, et sun jooskâi čiärumist. Tähtičiehhee vist ain njivoi laasâ tyehin. Advent-Benjamin leggistij toos nube lijne já čaalij taavlun:
Ele njivo, pikkâsevŋâdist täsni pyeremusávt uáinoo.
Tettee tavlu tájáskij. NJIVO NJIVO NJIVO NJIVO! Vittâ puustav njuškuu luuhâ kuuvl já tarvanii toos tego kiärpáš taman. Já tast maŋa luuhâst luuvâi:
_ _ _ _ U I N L Á Á J O T U Á _ V I N O O _ _ _
Tähtičiehhee-uv tom imâštâlâi.