Suvi Kivelä

Tiervâ!

Muu nommâ lii Suvi Kivelä já mun lam šoddâm Mäntäst ive 1977. Várrejim kuittâg maadâ-Suoman jo talle ko lijjim vala pärni já tobbeen, vistig Kauniaisist já talle maŋeláá aaibâs kaskoo uáivikavpug lam jottáám škovlâid ain luvâttuv räi. Luvâttuv maŋa mun juuttim oovtâ ive media kuursâ Helsegist já tom maŋâ vuolgim Skotlantin luuhâd oskoltahtiettuu Edinburgh ollaopattuvvâst. Tot pištij nelji ive já talle ko vijmâg finnejim tuđhos smiettim, ete halidiččim kale maassâd Suoman, mutâ jiem kuittâg innig kavpugân.

Lijjiim ovdil lamâš Siperiast, Jakutiast čälimin muu gradu-pargo já tobbeen lijjim uáli jo rähistum tavemaailmân. Mun muštám, ko kiinii Jakutiast muštâlij Anarist já tot paasij muu uáiván, ete tobbeen ličij mottoom škovlâ. Ko poottim Suomân te selvâttim tállán, ete mii tot škovlâ lii já nuuvbâ mun forgâ lijjim jo Anarist luhamin orjâlâškielâ Sogsakkist. Muu professor Edinburghist lâi faallâm munjin juátkouáppee saje já smiettim, ete na jis mun keččâlâm kavnâđ Anarist miinii mielâkiddevâš fáádáid já maasâm talle ive keččin.

Naa, nuuvtko elimist távjá kiävá, suunnattâlmeh iä aaibâs moonnâm nuuvtko juurdân lâi. Keevâi kuittâg pyerebeht. Ive keččin jiem lamâšgin Edinburghist, mutâ Pessi šoodâi. Tääl Pessi (2003) lii vuosmus luokka uáppee Anarâškielâ luokkaast já suu uččâ viljâ Jussa (2008) lii Kielâpiervâlist tipšoost, ko mun čáálám kirje Marja-Liisa Olthuisijn Anarâškielâ iäláskittemist. Muu fastâ pargo lii YLE Lapin Radiost, kost mun lam lamâš toimatteijee-reporter pargoost jo ive 2006 rääjeest. Oskom, ete maasâm toho puáttee ive aalgâst. Mun nievdâm, ete Anarâškielâ saavâid finniččij váhá lase resursijd pälkkiđ uđđâ toimâtteijee (muu!) Anja lasseen. Muu mielâst radiost, tv:st já interneetist kolgâččij leđe ennuv eenâb anarâškielâ ohjelmijd, eromâsávt uđđâseh, mutâ meiddei párnái já nuorâi ohjelmeh. Taat foorum lii čuvtij pyeri algâ toos kulij já tuođâi tuáivum, ete puohah puáttih teehin savastâllâđ!



Ellei toisin mainittu, tämän sivun sisällön lisenssi on Creative Commons Attribution-ShareAlike 3.0 License