Synonymeh.fi

Synonymeh.fi lii Anarâškielâ seervi toollâm synonymarkkâdâh. Synonymij nuurrâm aalgij Säämi kielâlävdikode ruttâdem projektáin. Synonymijd lii nuurrâm Petter Morottaja já listo lii tivodâm já toos lasattâllâm Matti Morottaja.

Synonym meerhâš sääni, mast lii siämmáš teikkâ masa siämmáš merhâšume ko nube säänist. Synonymarkkâduvvâst ij lah iäruttum tot, lii-uv sääni aldasynonym vâi káidussynonym (mon merhâšume ij lah nuuvt alda). Káidussynonym merhâšume sáttá iärániđ váldusänistis maaŋgânáál: tot sáttá kuvviđ siämmáá ääši mut tärkkilubbooht teikkâ almolubbooht, tast sáttá leđe ereslágán konnotaatio (stijlâiäru), teikkâ tom kevttim sáttá mudoi leđe ereslágán (motomijn ohtâvuođâin nubbe lii pyereeb, motomijn vist nubbe). Nuuvtpa arkkâduv kevttee ferttee synonym uuccâm maŋa visásmittiđ sääni tärhis merhâšume mottoom eres kälddest, ovdâmerkkân Itkos sänikirjeest.

Synonymarkkâdâh lii ornâšum tienuuvt, et jyehi uuccâmsääni kulá oovtâ teikkâ eenâb synonymperrui. Synonymperrust lii ohtâ vuáđumerhâšume (ovdâmerkkân 'puurrâđ') já puoh toh säänih, moh láá ton merhâšume synonymeh. Jis säänist láá eenâb ko ohtâ merhâšume, te tot sáttá kuullâđ maaŋgâ-uv synonymperrui. Nuuvtpa ovdâmerkkân njielâliđ sáttá kale leđe 'puurrâđ' synonym, mut tast lii meiddei nubbe, koŋkretlub merhâšume 'njiellâđ maidnii jotelávt' (ij aainâs puurrâđ). Ko arkkâduvvâst ocá mottoom sääni, te maašin ocá puoh synonymperruid mast sääni lii fáárust, já jyehi perruu peht lii meiddei almottum, mii perruu vuáđumerhâšume lii. Ovdâmerkkân njielâliđ-sääni kulá tuše ton perrui, mon eidusâš merhâšume lii 'puurrâđ', nube merhâšuumeest 'njiellâđ maidnii jotelávt' iä lah arkkâduvvâst synonymeh.

Ellei toisin mainittu, tämän sivun sisällön lisenssi on Creative Commons Attribution-ShareAlike 3.0 License